Makaaw-awat ita ti pammadayaw ni Lady Anne Duya, maysa nga aeta manipud Pampanga kalpasan a maysa daytoy kadagiti 15,684 nga examinees a pimmasa iti kaleppas a Criminologist Licensure Examination.
Isuna gamin ti kaunaan a babai iti triboda a Mag-indi wenno Mag-antsi a pimmasa iti nasao nga eksaminasyon.
Nagala ni Duya ti kurso a criminology iti Central Luzon College of Science and Technology idiay San Fernando, Pampanga ken nagturpos daytoy idi Hulyo 2023.
Bayat ti panag-eskwela ni Duya, nakaawat metlaeng daytoy ti nagduduma a pammadayaw kas ti Most Outstanding Criminology intern, service awardee ken Best in Thesis.
Pinagyamanan met ni Duya ti National Commission on Indigenous Peoples (NCIP) Pampanga ken provincial government gapu iti scholarship nga impaayda kadakuada.
Maipalagip nga idi napan a tawen ket nabigbig ni Dexter Santos Valenton kas kaunaan nga Aeta a pimmasa iti Criminology Board Exam.
