BAGUIO CITY – Saan pay laeng a makaipaay iti komento ti Philippine Drug Enforcement Agency wenno PDEA – Cordillera mainaig iti kaso ni Judge Antonio Reyes ti Regional Trial Court Branch 61 ditoy siudad ti Baguio.
Kasaruno pay laeng daytoy ti rekomendasyon iti Korte Suprema a maipilaan ni Judge Reyes iti kaso nga administratibo gapu iti korapsyon.
Sigun kenni Joseph Calulut, pannakangiwat ti PDEA – Cordillera, awan paylaeng ti naawat dagitoy a pormal a dokumento manipud iti korte.
Nupay kasta, inaklonna a nangisumitiren ti PDEA iti affidavit kontra kenni Reyes kalpasan a naibutaktak ti anomalya a nagaw-awat ti mahistrado iti P50,000 kasukat ti panakaibasura dagiti kaso nga iniggeman daytoy mainaig iti iligal a droga.
Immunan nga inrekomendar ni retired Supreme Court Associate Justice Roberto Abad ti panangidatag ti korte suprema iti nasao a kaso kontra kenni Reyes.
Ni Abad ti nabilin a mangisayangkat iti fact-finding investigation iti panakairaman iti transaksyon ti iligal a droga dagiti sumagmamano nga ukom ken nangisumitir daytoy iti report a mangdaldalus iti nagan ti tallo a mahistrado malaksid kenni Reyes.
Pinaglibakan met ni Reyes dagiti alegasyon kontra kenkuana.
