Kwinestyunaran ni Senator Rodante Marcoleta ti kinuna ti abogado a saanna a pirma ti adda iti notaryo iti sworn affidavit ti testigo a ni Orly Guteza.
Inlawlawag ni Senator Marcoleta a maysa a kadawyan a mapaspasamak kadagiti notary public a saan a dagiti abogado a mismo ti agpirpirma nu di ket dagiti assistant wenno sekretarya da.
Nupay kasta, inaklonna a maiparit ti nasao nga aramid ngem impettengna nga adda dagiti kaso a tultuladen ti staff wenno secretary ti pirma ti abogado a rumbeng koma nga agnotaryo.
Kagiddan dayta, binallaagan ti senador ti abogado a nakanagan iti notaryo iti sworn affidavit ni Guteza a mabalin a ma-disbar daytoy nu saanna a bigbigen ti pirmana.
Nangipaay ni Marcoleta iti sabali pay a dokumento a ni-notaryoan metlaeng ti kapada nga abogado nu sadino, naipakita dagiti nagpadaanda pakairamanan dagiti stamp ken daduma pay a notarial details tapno paneknekan nga opisyal a nanotrayoan ti affidavit ti testigo a ni Guteza.
Maipalagip nga idi napan a lawas, insalaysay ni Guteza a maysa daytoy kadagiti nangideliver iti maleta a naglaon kadagiti kwarta iti maatap a pagtaengan ni sigud nga House Speaker Martin Romualdez ken ni Zaldy Co.
