Pagsagsaganaen ni Armed Forces of the Philippines (AFP) chief of staff General Romeo Brawner Jr. dagiti tropana iti Northern Luzon Command (NOLCOM) ken kinunana a palawaenda pay ti “sphere of operations” dagitoy, ken ti mabalin nga “emergency” ti pagilian a Taiwan.
Ti Northern Luzon Command (NOLCOM) ket maysa nga unified command ti Armed Forces of the Philippines a responsable iti panangseguro iti Ilocos Region, Cordillera Administrative Region, Cagayan Valley, ken Central Luzon, pakairamanan ti Bajo de Masinloc wenno Scarborough Shoal ken ti Philippine Rise.
Inlawlawag ni Brawner a no aniaman ti mabalin a mapasamak ti Taiwan, kasapulan a makipasetda.
Sigun iti nasao nga opisial, dumanon iti 250,000 nga Overseas Filipino Workers ti adda sadiay Taiwan ken kasapulan a maispalda.
Impaganetgetna pay a trabaho ti NOLCOM ti adda iti “frontline” iti operasyon.
Maipalagip nga ikalkalintegan ti China a ti Taiwan ket paset ti teritoriona.
Nangibaon idi kalman ti China kadagiti puersa ti army, navy, air ken rocket a manglikmut iti Taiwan para kadagiti dadakkel a drills a sigun iti Beijing, China, nairanta daytoy a mangsanay para kadagiti “precision strikes.”
Nangipatulod met ti Taiwan kadagiti bukodna nga eroplano ken barko, ken nanagideploy ti land-based missile systems,kas sungbat kadagiti panagsanay ti China.
Inakusaran pay ti Taiwan ti China a daytoy ti “biggest troublemaker” iti sangalubungan.
