BAGUIO CITY – Agtultuloy paylaeng ti pursuit operations nga isaysayangkat ti Philippine National police ken ti Armed Forces of the Philippines kadagiti kameng ti New People’s Army a nangraut iti temporaryo a kampo dagiti pulis ken nangsaneb iti convoy ti provincial director ti Abra PNP sadiay Malibcong, Abra.
Sigun kenni Col. Henry Doyaoen, deputy brigade commander ti 503rd Infantry Brigade, ti nasao a panagraut ket posible nga adda panakainaiganna iti umadani a maika-uppat a pulo ket walo a tawen nga anibersaryo dagiti NPA intun Marso 29.
Innayunna a gapu iti daytoy ket iningetanda ti panagwanawan dagitoy.
Kinunana a naka-heightened alert dagitoy agramanen ti PNP gapu pay laeng iti nasao a banag.
Maipalagip nga idi Marso 29, 1969, binukel ni Bernabe Buscayno alyas “Commander Dante” ti New People’s Army nga armed wing ti Communist Party of the Philippines.
