Kinumpirma ti Armed Forces of the Philippines (AFP) a kiniddaw ti maysa a kadete ti relo ni President Ferdinand Marcos Jr. kabayatan ti graduation ceremony ti Philippine Military Academy idi Mayo iti agdama a tawen.
Daytoy ti isyu a mapapati nga inladawan ni Vice President Duterte iti kaudian a media conference daytoy a nangitunda iti kinunana a ti relasionda kenni Marcos ket “toxic” ken inladawanna ti panangputedna iti ulo ni Marcos kalpasan a saanna a pinaburan ti Presidente ti kiddaw ti nasao a kadete.
Nupay kasta, kinuna ni Armed Forces of the Philippines Colonel Francel Margareth Padilla a ti inaramid ti kadete ket saan a mangipakita iti pakabuklan a kultura ken panagsanay iti akademia.
Inyunay-unay met ni Padilla a nagbiddut ti kadete iti inaramidna isu’t gapuna a nakaawat daytoy iti dusa ngem saan a naipaikkat.
Iti agdama, nakadestino iti Philippine Air Force ti nasao a kadete.
Maipalagip a maysa metlaeng a kadete ti nagkiddaw iti relo ni sigud a presidente Rodrigo Duterte kabayatan ti 2019 Philippine Military Academy graduation ceremony nu sadino pinatgan daytoy ni Duterte.
