BAGUIO CITY – Nakemmeg ti ag-live in partner nga estudyante iti buy-bust operation nga insayangkat dagiti otoridad sadiay Suello Village, Bakakeng Central, Baguio City idi kalman.
Nabigbig dagitoy a da Holy Elyjam Yango, 20-anyos ken Rhona Bell Ticuala, 19-anyos.
Nakumpiskar kadakuada ti innem a pakete ti mapapati a shabu nga agdagsen ti 50 gramo ken aggatad ti P340-K.
Iti agdama, sumangsango dagiti dua iti kaso a panaglabsing iti Comprehensive Dangerous Drugs Act of 2002.
Naisayangkat ti operasyon babaen iti nagtipon a pwersa ti PDEA-Baguio-Benguet ken Baguio City Police Office.
Sigun iti PDEA-Cordillera, ti operasyon ket paset ti nairtengan a kampanya kontra iti iligal a droga gaputa uray nalimitaran ita ti garaw ken panagbiahe dagiti tattao gapu iti COVID-19 pandemic ket makaar-aramid latta dagiti sindikato iti wagas tapnu maiwaras ken mailako ti iligal a produkto dagitoy.
