BAGUIO CITY – Natalgeden ti kasasaad ti tallo nga aga-ama kalpasan a nabaliktad ti kotse a nagluganan dagitoy sadiay Km. 3, Asin Road, Baguio City idi kalman.
Nabigbig ti ama a ni Nino Frianela, 42-anyos ken dagiti dua nga annakna a da Dyaeco Frianela, 11-anyos ken Dyala Frianela, 13-anyos ken residente dagitoy ti Amaparo Heights, Camp 7, Baguio City.
Maibasar iti report, kabayatan ti panagdalyasat dagitoy sadiay Asin Road ket nag-overtake ni Mr. Frianela iti bangir a linya ti kalsada.
Nupay kasta, saanna a nakontrol ti manibela agingga a naidungpar ti lugan iti road gutter ken iti Gate 2 ti Santa Lucia Subdivision.
Dagus a naitaray dagiti pasahero iti pagagasan gapu iti nasagrapda a dunor bayat a mabambantayan ti kotse iti masakupan ti subdivision.
