Nadadael ti agarop 10,000 a tanem iti maysa a sementeryo idiay Bogo City, Cebu gapu iti gingined a napasamak idi ngudo ti Setyembre.
Sigun iti caretaker iti Corazon Cemetery, dandani kagudwa kadagiti 20,000 a tanem ti naapektaran nu sadino, dagiti nasemento wenno concrete ket nabetak.
Gapu iti dayta, agkidkiddaw ti management ti nasao a sementeryo iti panakaawat ti publiko bayat nga ur-urayenda dagiti pakaammo nu kasano a matarimaan dagitoy.
Maipalagip nga iti napasamak a magnitude 6.9 a gingined idiay Cebu, saan a bumaba iti 70 ti death toll bayat nga adu pay ti nadangran.
Maysa a kangrunaan a naapektaran ket ti imprastraktura nga iti agdama ket uray dagiti opisyal ket saan pay a sigurado nu natalged a pagdagusan dagiti evacuation centers.
Gapu iti dayta, rinibribo a residente ti napukawan iti pagtaengan ken mangnamnama iti ipaay a tulong iti gobyerno.
