Maitampok ti agarop 16 nga streetdance ken drum & lyre participants iti maangay a parada inton March 22 a paset ti manarimaan nga Strawberry Festival idiay La Trinidad, Benguet.
Malaksid iti dayta, manamnama metlaeng a maimatangan iti kapada a parada ti 15 a barangay floats ken 3 a guest floats manipod iti pribado a sektor.
Iti panakiuman iti Bombo Radyo kenni Valred Olsim, tourism officer iti La Trinidad, Benguet, addan dagitoy iti katengngaan ti pakabuklan dagiti aktibidad a nakalinya para iti 2025 Strawberry Festival nu sadino, immunan a naipatungpal ti mural contest, jobs fair, accoustic band competition, ken ti panaglukat iti strawberry lane ken ti agro-fair kasaruno ti opisyal a panakaiyuswat ti nasao a piesta idi March 3.
Sigun kenni Olsim ken kas maibasar iti calendar of activities, adu pay dagiti mapadpadaanan a major events kas iti seach for the heaviest and sweetest strawberries inton March 14, Duting Tan Dukto fun run inton March 15, main program ken civic parade inton March 18,strawberry cakefest inton March 23, cornation night iti Mr. and Ms. La Trinidad inton March 27 ken daduma pay.
Sipud met nailukat ti strawberry lane ken ti commercial trade fair area ket nawaya dagiti sumarungkar nga aggatang sadiay.
Iti strawberry lane,mabalin a magatang dagiti nagduduma a produkto a naaramid usar dagiti strawberries kas iti jams,pastries, ken wines kasta metten dagiti daduma pay a food innovations dagiti nakipartisipar kas iti strawberry coffee, ice cream, ken dagiti donuts wenno bagels.
Imbinglay ni Olsim nga adu metlaeng kadagiti strawberries ti nagtaud iti nagduduma a lugar kas iti Puguis ken Wangal.
Kabayatanna,dinakamat ti opisyal nga agingga iti agdama ket umdas paylaeng ti suplay iti strawberries.//Bombo Rob Dominguez
