Kinumpirmar ni Frank Almoza, Barangay Captain ti Barangay Loacan, iti Bombo Radyo Baguio a sangapulo a pamilya ti naapektaran iti napasamak a soil erosion idiay Sitio Tolibeng idi Agosto 30.
Maibasar iti pannakipatang ti Bombo kenni Barangay Captain Almoza, naapektaran ti Alphaland area ken Sitio Tolibeng gapu iti napasamak no sadino sangapulo a pamilya a bukbuklen ti 41 nga indibudual ti apektado.
Karaman kadagitoy ti dua a senior citizen, dose a menor-de-edad, ken maysa a masikog.
Dagos met dagitoy a naibakwit kadagiti asideg a kapamilyada iti isu metlaeng a barangay iti tulong ti kapulisan, barangay officials, ken residente iti nasao a sitio.
Awan met ti naireport a pimmusay gapu iti napasamak ngem nadadael dagiti sumagmamano a pagtaengan dagiti biktima.
Kanayonanna, naipaay met dagiti kangrunaan a pangkasapulan kas assistance pakairamanan ti relief goods kadagiti apektado a pamilya.
Kabayatanna, para kadagiti naayat a mangipaay iti tulong ken assistance para kadagiti pamilya a naapektaran, mabalin a kontaken ti cellphone number a 0956-224-4825 wenno direkta a makikoordinar iti Barangay Loacan. //kcs//