BAGUIO CITY – Naitaray iti ospital ti agarup sangapulo nga indibidual kalpasan natumba ti naglugananda a jeep kasaruno ti panangdungpar daytoy iti maysa a motorsiklo sadiay Quirino Highway, partikular iti Kalipkip, Banangan, Sablan, Benguet itay agsapa.
Segun kenni PSI Alfredo Dacumos, hepe ti Sablan Municipal Police Station, naitaray iti ospital ti driver ti motorsiklo, driver ti jeep agramanen dagiti pasahero daytoy a kaaduan ket estudyante.
Kinunana a ti nasao a jeep ket nagtaud ditoy siudad ti Baguio ken paturong kuma sadiay La Union idi napasamak ti aksidente.
Dinakamatna a maibasar iti inisyal nga imbestigasyon dagitoy ket nag-overtake ti jeep ken saan a nakontrol ti driver ti manibela agingga a nadungpar daytoy ti kasabatna a motorsiklo sakbay a natumba ti nasao a jeep.
Dagus met a nagresponde dagiti pulis agramanen ti emergency services ken intarayda dagiti biktima iti Baguio General Hospital and Medical Center nga iti agdama ket adda iti natalged a kasasaad.
Kagiddan iti daytoy ket immapela ni PSI Dacumos kadagiti motorista nga agannadda iti panagmaneho dagitoy nangruna ita a makumikom dagiti kalsada gaputa adu dagiti turista.
————– Filipino translation ———
BAGUIO CITY – Isinugod sa ospital ang halos 10 katao na nasugatan sa pagkatumba ng isang jeep matapos banggain ang isang motorsiklo sa Quirino Highway, partikular sa Kalipkip, Banangan, Sablan, Benguet kaninang umaga.
Sa panayam ng Bombo Radyo kay PSI Alfredo Dacumos, hepe ng Sablan Municipal Police Station, sinabi niya na isinugod sa ospital ang driver ng motorsiklo, driver ng jeep maging ang mga pasahero nito na karamihan ay estudyante.
Sinabi niya na galing ng Baguio ang jeep at patungo sa La Union nang mag-overtake umano ito kung saan, hindi nakontrol ng driver ang manibela hanggang sa nabangga nito ang motorsiklo bago ito natumba.
Agad namang nagresponde ang mga pulis at ang emergency services at isinugod nila ang mga biktima sa ospital na sa ngayon ay nasa mabuting kalagayan.
Dahil dito ay umapela si PSI Dacumos sa mga motorista na mag-ingat sa pagmamaneho upang maiwasan ang anumang aksidente.
