Boluntaryo a simmuko kadagiti otoridad ti agarup 100 a maatap a sigud a rebelde sadiay Talaingod, Davao del Norte idi Martes, January 27, 2026.
Sigun iti 10th Infantry Division (10ID), dagiti simmuko ket sigud a miembro ti guerilla fronts, Pulang Bagani Commands, regional headquarters, ken sub-regional committees iti sidong ti Southern Mindanao Regional Committee (SMRC) ti New People’s Army (NPA).
Kabayatanna, kinuna ti Provincial Government ti Davao del Norte a 74 kadagiti simmuko ket nagtaud sadiay Talaingod bayat a 21 ti manipud met sadiay Agusan del Sur.
Ti mass surrender ket inorganisar ti 60th Infantry Battalion ken local government officials.
Karaman dagiti agarup 29 a paltog kadagiti insuko dagiti sigud a rebelde.
Naipaayan dagitoy iti food packs ken financial assistance manipud iti local a gobierno para iti pangrugian dagitoy.
