Narescue ti agarup 11 a babbai pakairamanan ti innem a menor de edad babaen iti insayangkat nga entrapment and rescue operation ti National Bureau of Investigation—Cordillera Administrative Region (NBI-CAR) iti maysa a hotel iti siudad ti Baguio idi Agosto 3, 2026.
Naisayangkat ti nasao nga operasyon kalpasan iti impormasyon nga ada ti maysa a babae a nailinged iti nagan a “Rose” a mangidiaydiaya kadagiti babbai ken mangibibiyahe kadagitoy manipud Bulacan paturong Baguio City para iti sexual services kasukat iti kuwarta.
Kanayonanna, iti dayta metlaeng nga aldaw, naiturong ti sumagmamano pay a babbai iti siudad babaen iti dua a private van.
Apaman a nakasangpet dagitoy iti hotel, dagos nga naipresenta dagiti 11 a babbai iti transaction room iti NBI personnel a nagpammarang kas kustomer. Nangiawat met ti NBI personnel iti bayadna a namarkaan kas entrapment money.
Apaman nga inawatda ti bayad daytoy, naikanen ti signal dagiti otoridad tapno isayangkatda ti entrapment and rescue operation.
Dagos met a naiturnover dagiti biktima iti Department of Social Welfare and Development para iti assessment, counseling, ken dadduma pay nga intervention a kasapulan.
Kabayatanna, dua a suspek ti naarestar kabayatan iti nasao nga operasyon. Naiturong da metten idiay National Bureau of Investigastion-Cordillera Office para iti booking, medical examination, ken custodial processing.//bombokaren.c.sapirao
Source: NBI