BAGUIO CITY – Manamnama nga agnumar ti agarup 12,000 a turista manipud iti subsidized antigen test nga iyusuat ti lokal a gobyerno ti Baguio inton April 5, aldaw ti Lunes.
Sigun kenni Supervising City Tourism Operations Officer Engr. Alec Mapalo, panggep ti addang a makatulong iti natalged, in-inot, sigurado ken responsable a panaglukat ti industriya ti turismo iti siudad.
Inlawlawagna nga iti implementasyon ti nasao a programa ket agbalin a P350 ti bayadan dagiti turista para iti antigen test nupay daytoy ket iti “first come, first serve basis” ken agingga nga adda ti pondo.
Naamuan a nakaawat ti Baguio iti subsidiya a P1.8-M manipud iti Tourism Promotions Board para iti agresibo a panakaital-o ti lokal a turismo a nakaro a naapektaran iti agdama a pandemya ken tapnu maallukoy pay ti ad-adu a turista nga agturong ditoy siudad.
Inlawlawag pay ni Engr. Mapalo a maiyaplikar ti subsidiya kadagiti turista nga agdesisyon nga agpa-antigen test iti central triage ti Baguio apaman a makasangpetda ditoy siudad kalpasan ti panagparehistroda iti VISITA online registration platform ken iti panakaited kadakuada ti QR-Coded Tourist Pass.
Iti agdama, P500 paylaeng ti bayadan dagiti turista a napalubusan a makastrek ditoy Baguio iti panagpa-antigen test dagitoy bayat a P350 tunggal antigen test kadagiti residente ti Baguio a masansan nga agbibiahe iti ruar ti siudad.
