Mapatta-patta a dumanon iti 170-K a trabaho iti lokalidad ken ballasiw -taaw ti maidiaya iti pagilian iti maisayangkat a natiowide job fair inton Mayo a uno iti agdama a tawen, ti Labor Day.
Sigun kenni Labor Secretary Bienvenido Laguesma, dagiti job fairs a maisayangkat ket pakipasetan ti 2, 000 nga employers ken daytoy ket maipatungpal kadagiti nagduduma a mall iti pagilian.
Nupay kasta, manamnama a manayunan dagiti employers a makipaset nangruna ket adda pay ti nabatbati nga aldaw sakbay ti Labor Day.
Maibasar iti datos ti Philippine Statistics Authority, dumanon iti 1.94 million a Pilipino nga agtawen iti sangapulo ket lima pangato ket unemployed idi Pebrero.
Daytoy ket nangatngato no idilig iti 1.80 million a Pilipino nga awanan iti trabaho idi Pebrero idi napalabas a tawen.
Kabayatanna, dumanon iti 49.15 million a Pilipino ti employed no sadino mangipaspasimudaag a tu employment rate iti pagilian ket dumanon iti 96.2%.
