BAGUIO CITY – Agtultuloy ti imbestigasyon dagiti bombero tapnu maduktalan ti nagtaudan ti uram iti kabambantayan sadiay Nalseb, Ambassador, Tublay, Benguet idi kanikadua.
Sigun iti Tublay Fire Station, dumanon iti agarup 20 nga ektarya iti kabambantayan a namulaan ti pine trees ti nauram.
Naapektaran metlaeng iti nasao nga uram ti sumagmamano a poste ti kuryente a tagikua ti BENECO a nangitunda iti panakaiddep ti kuryente iti rabii ti February 19.
Awan met ti nadangran nga indibidual ken nauram a pagtaengan iti nasao a forest fire a nangrugi iti agarup 2:25 ti malem.
Nagtitinnulong dagiti bombero ti Tublay ken La Trinidad, Benguet ken dagiti umili iti manual a panakasebseb ti apoy.
Kagiddan iti daytoy, palpalagipan manen dagiti otoridad dagiti umili iti saan dagitoy a panagpu-or iti asideg dagiti kakaykaywan.
