Kinordonanen ti City Disaster Reduction Management Office ti agarup 20 meter radius wenno aglawlaw ti nakapasamakan ti landslide idiay Purok 2, Guisad Surong, Baguio City.
Kagidan daytoy iti pannakaideklara iti “no build zone’ iti nasao a lugar.
Sigun kenni Engr. Charles Bryan Carame, Department Head ti City Disaster Risk Reduction and Management Office, kinordonanda daytoy bayat a maururay pay laeng ti evaluation manipud iti Barangay Officials, Mines Geosciences Bureau (MGB), City Planning, ken iti City Building and Architecture Office.
Impetteng ni Carame a nakadepende ti panagsubli dagiti pamilya wenno agnanaed iti asideg ti nargaay a daga iti resulta ti evaluation dagiti nadakamat nga opisina.
Innayon metlaeng daytoy a saan pay laeng a makasubli dagiti agtataeng iti tallo a babbalay sadiay agingga ita kasta metlaeng kadagiti dadduma pay nga agtataeng sadiay.
Kagidan dayta, imbinglayna a naka pre-emptive evaluation metlaengen dagiti agtataeng kadagiti babbalay nga ada iti makin-ngato bayat a maur-uray ti resolution.
Inlawlawag met ni Engineer Carame a mabalin nga agsubli dagiti agtataeng sadiay ngem nasken pay ti engineering measure tapno maliklikan ti panagregaay manen ti daga iti nasao a lugar.
Kinunana pay a nakikoordinarda metten iti maseknan nga ahensya kas iti, Barangay Officials ken Baguio City Police Office tapno mabantayan ti nasao a pasdek.
Iti sabali a bangir, mannarimaan met ti clearing operation idiay Ground Zeri no sadino puntiryada a malinisan ti turning point ti lugan sadiay ken malinisan ti kawayan gapu ta daytoy ti makitkitada a maysa a rason ti panagreggaay ti daga sadiay. // via Bombo Noveh Organo