Dumanonen iti agarup dua gasut nga indibidual ti pimmusay iti napasamak a pannakatnag ti eroplano ti Air India a paturong idiay London a naglaon iti 242 a tattao sumagmamano a minuto kalpasan a timmayab manipod iti makindaya a siudad ti India.
Sigun kadagiti otoridad, 217 ti nataengan, 11 ti ubbing ken dua ti maladaga a naglugan iti eroplano.
Manipod iti nasao a bilang, 169 ti Indian nationals, 53 ti Britons, pito ti Portuguese, ken maysa ti Canadian, sigun iti Air India.
Kinunana dagiti lokal nga otoridad nga adda ti maysa a “survivor” a nagtugaw iti seat 11A ken posible nga adda pay dagiti dadduma a “survivors” iti ospital.
Ti natnagan ti eroplano ket maysa a residential area nga asideg iti airport.
Ngem sigun met iti maysa a senior police officer, ti pasdek a natnagan mismo ti eroplano ket doctors’ hostel nu sadinno, nagwaras ti rebbek iti aglawlaw ti pasdek ken maimatangan iti maysa a video ti ipus ti eroplano iti ngato ti pasdek.
Iti agdama, manarimaan paylaeng ti imbestigasion ti lokal nga otoridad iti napasamak nga insidente ken dukduktalen paylaeng ti Air India iti pudno a napasamak.
