BAGUIO CITY – Dumanon iti agarup 24, 000 a trabaho ti idiaya dagiti nagduduma a kompanya ditoy lokalidad ken iti ballasiw-taaw babaen iti Jobs Fair nga idauloan ti DOLE-Cordillera inton Mayo 1, aldaw ti lunes iti Baguio Convention Center.
Iti panakiuman ti Bombo Radyo kenni Exequiel Ronie Guzman, regional director ti DOLE Cordillera, kinunana a sangapulo ket lima nga overseas recruitment agencies ti mangidiaya iti agarup 21, 000 a job vacancies bayat a tallopulo ket uppat a kompanya ditoy lokalidad ti mangidiaya iti agarup talloribu a trabaho.
Makipaset met laeng iti job’s fair ti dua nga ahensia ti gobyerno pakairaman ti PDEA-Cordillera nga agkasapulan iti agarup duagasut nga intelligence officers.
Dinakamatna met a dagiti kasapulan ket english teachers, sales representatives, ken dadduma a trabaho ditoy lokalidad bayat nga iti abroad ket dagiti nurses, technicians, construction workers, agricultural workers ken dadduma pay malaksid iti domestic helper.
Inlawlawagna a saandan a pinalubosan ti panakaidiaya ti domestic helper a trabaho gapu pay laeng iti adu a kaso ti panakaabuso dagiti domestic helpers iti balasiw-taaw ken narigat a mapaawid dagitoy.
Ti nasao a jobs fair ket mangrugi iti alas otso ti agsapa ken agleppas iti alas singko ti malem.
