Agarup 269 a kapulisan iti rehiyon Cordillera ti nagsapata iti baro a posisyonda iti naisayangkat nga oath-taking, donning, ken pinning of ranks a napasamak idi kalman.
Indauloan daytoy ni PRO CAR Regional Director PBGEN ERICSON D DILAG no sadino naital-o dagiti nasao a kapulisan manipud iti ranggo a Police Corporal iti Police Major.
Personal daytoy a pinasetan dagiti personnel manipud Regional Headquarters, Baguio City Police Office, Benguet Police Provincial Office, ken Regional Mobile Force Battalion 15 bayat a dagiti promotee manipud iti dadduma a police provincial offices ket nakipaset babaen iti online.
Ti grupo dagiti promotees ket bukbuklen ti 78 Police Commissioned Officers (PCOs) ken 191 Police Non-Commissioned Officers (PNCOs).
Manipud kadagiti 78 Police Commissioned Officers (PCOs) , 37 ti napromote kas Police Major, lima ti napromote kas Police Captain, ken 36 ti naital-o kas Police Lieutenant.
Iti met Police Non-Commissioned Officers (PNCOs), maysa ti napromote kas Police Executive Master Sergeant, 28 kas Police Chief Master Sergeant, dua kas Police Senior Master Sergeant, 26 kas Police Master Sergeant, 61 kas Police Staff Sergeant, ken 73 ti naital-o kas Police Corporal.
Amin dagitoy ket pimmasa iti screening process ti PRO-CAR Promotion Board.
Iti mensage ni PBGEN DILAG, kinablaawanna dagiti naital-o a pulis. Kagidan dayta, inpallagipna kadakuada a kagidan ti pannakapromote dagitoy ket ti nadagdagsen a responsibilidad ken accountability dagitoy. //bombokaren.c.sapirao