Nakaawat ti National Bureau of Investigation-Cordillera iti agarup uppat a gasut a reklamo seknan iti Farm to Market Investment Scam ita a tawen.
Sigun kenni Atty. Diosdado Araos, Regional Director ti National Bureau of Investigation-Cordillera, kaaduan kadagiti nagreklamo ket babbai manipud iti siyudad ti Baguio.
Kinuna pay ni Araos a nababa paylaeng ti bilang ti kaso a naipila kontra kadagiti suspek gapu iti kinakurang ti ebidensya.
Mainaig iti dayta, impeksa met ni Police Lieutenant Pink Pearl Alonzo Amdengan, Chief Investigator ti Criminal Investigation and Detection Group Regional Field Unit 14 iti rehiyon Cordillera nga iti agdama ket agarup tallo pulo nga indibidual ti nangipila iti reklamo kontra kadagiti farm to market investment scammers iti opisina dagitoy.
Sigun kenni PLT Amdengan, inkari dagiti suspek kadagiti biktima ti high returns of investments dagitoy wenno agdoble wenno ag-triple dagiti kuarta dagitoy nu ag-investda iti hog and poultry raising a negosyo ti suspek.
Innayon pay ni PLT Amdengan nga in-umanda ti nasao a farm to market iti Securities and Exchange Commission ken impaganetget met ti naud-udi wenno ti SEC a saan a rehistrado wenno autorisado ti nasao a farm to market nga agkiddaw iti investments.
Gapu iti dayta, guyguyuguyen ti CIDG dagiti biktima iti nasao a scam gapu ta sigun kenni PLT Amdengan, dagiti agdama a kaso ket pending wenno saan paylaeng a naipila ti kaskenan a kaso kontra kadagiti suspek.
