Makapaspasar ti agarup 400 milyon nga ubbing iti sangalubungan nga awan pay ti lima a tawenda ti kinaranggas a panagdisiplina iti pagtaengan dagitoy manipod iti panagbaot agingga iti panang-insulto kadagitoy, sigun iti UN Children’s Fund (UNICEF).
Daytoy ket maibasar iti datos manipod iti sangagasut a pagilian a nakolektar ti nasao nga ahensia manipod iti tawen 2010 agingga 2013 nu sadinno, saklawen daytoy ti “physical punishment” ken “psychological aggression.”
Para iti nasao nga ahensia, ti “psychological abuse” ket karaman ti panagpukkaw iti maysa nga ubing wenno panang-awagda kadagitoy a ‘nasadut’ ken ‘awanan ti ammo’ bayat a ti “physical abuse” ket karaman ti panangyugyugyog, panangkabil wenno panangsapsaplit iti ubing, wenno aniaman nga aramid a nairanta a mangpataud iti pisikal nga ut-ot wenno pannakariribuk, a saan a madangdangran.
Iti dandani 400 milyon nga ubbing, agarup 330 milyon kadagitoy ket nakapasar ti pisikal a dusa.
Numan pay naipawil ti panangipaay ti pannusa kadagiti ubbing iti kaaduan a pagilian, dandani 500 milyon nga ubbing nga agtawen ti lima ti saan a ligal a masalsalakniban kontra iti nasao nga aramid.
Patyen ni ti maysa kadagiti uppat a nanang a ti pisikal a dusa ket kasapulan tapno umno a maipaayan ti leksion dagiti annakda.
Kabayatanna, iti umuna a gundaway, impablaak ti UNICEF dagiti natakuatanda maipapan iti “access” a masapul nga agay-ayam dagiti ubbing.
Maibasar iti datos manipod iti 85 a pagilian, maysa iti tunggal dua nga ubbing nga nga agtawen iti uppat ti saan a makaay-ayam iti tao a mangay-aywan kadakuada iti pagtaengan, ken agarup maysa iti tunggal walo nga ubbing nga awan pay lima ti tawenna ti awan a pulos ti ay-ayamna.
Agarup uppat a pulo a porsiente kadagiti ubbing nga agtawen ti dua agingga uppat ti saan a makapaspasar iti nasayaat a pannakilangen-langen iti uneg ti pagtaengan.
Ken maysa iti sangapulo ket saan a maka-“access” iti aktibidad a mangpasayaat ti cognitive, social, ken “emotional development” a kas ti panagbasa, “storytelling”, panagkanta, ken “drawing”.
Gapu iti dayta, guyguyuguyen ni Russel nga agkaykaysa iti publiko tapno agkomitar manen kontra iti kinaranggas kadagiti ubbing.
