BAGUIO CITY – Nadiskobre ti Commission on Elections (COMELEC) a dumanon iti 400 nga empleyado ti lokal a gobyerno ti Baguio City ti inactive voters.
Iti interview ti Bombo Radyo kenni City Election Officer Atty. John Paul Martin, kinunana a nadiskobrena daytoy idi kiniddawna ti listaan dagiti empleyado ti City Hall a karaman kadagiti indigenous peoples para iti panag-update ti datus ti komisyon.
Indiligna ti nasao a listaan iti database ti COMELEC-Baguio ken sadiay a naduktalanna nga adu nga empleyado iti City Hall ti inactive voters wenno dagiti saan a nagbotos iti namindua ken nagsaruno a daras.
Kinunana nga inrason dagiti nasao nga empleyado a saanda a nagbotos gapu iti amakda a makaunget kadakuada dagiti mabotosan nga opisyales no maamuan dagitoy a saanda nga imbotos dagitoy.
Nupay kasta, impetteng ni Atty. Martin nga awan ti maka-ammo no asino dagiti inbotos ti maysa a botante ken saan a rason ti impartiality tapnu saanda nga agbotos.
Innayonna a nasken a dagiti mismo empleyado ti gobyerno ti agbalin a modelo gaputa saan a napintas a kitan no mismo a dagiti taga-gobyerno a mangikamkampanya ti panagbaliw ket saan gayam a rehistrado ken saan nga agbotbotos.
Gapu iti daytoy, dinakamatna a mangisayangkat ti COMELEC-Baguio iti offline registration sadiay City Hall para kadagiti nasao nga empleyado ken isarunoda dagiti GOCCs, national line agencies ken local agencies.
