BAGUIO CITY – Nagsapatan dagiti kabarbaro a Police Officer 1 ti Police Regional Office Cordillera (PROCOR) sadiay Camp Bado Dangwa, La Trinidad, Benguet idi kalman.
Segun iti Cordillera PNP, dumanon laeng iti 494 ti pakabukalan a bilang dagiti nagsapata a bukbuklen ti 334 a lallaki ken 160 a babbai manipud iti nasurok 1,200 nga aplikante ti PROCOR para iti PO1.
Kalpasanna ket naipaima dagiti baro a PO1 iti Cordillera Training Center sadiay Teachers Camp ken agadalda sadiay iti las-ud ti innem a bulan.
Kalpasan met ti panagadal dagitoy ket maipasidongda iti Field Training ken maipatulodda iti nagduduma a komunidad agingga nga agbalin dagitoy a permanente a pulis.
Maipalagip nga iti kaudian a waragawag dagiti opisyal ti PROCOR ket ado dagiti bimmagsak iti neuroexam a maysa kadagiti proseso ti aplikasyon isut gapuna a bassit dagiti nagtuloy iti pinal nga screening.
