Pimmusay ti lima pulo ket maysa (51) nga indibidual ken nasurok sangagasut ti nadangran iti napasamak nga uram iti maysa a nightclub idi kalman iti ili ti Kocani idiay North Macedonia.
Sigun kenni Interior Minister Pance Toskovski, ti rason ti uram ket gapu iti “pyrotechnic devices” a naaramat bayat ti konsierto.
Maimatangan iti naberipikar a video nga adda ti maysa a banda a nagtokar iti entablado bayat nga iggemda ti dua a “flare” a mangiruruar kadagiti puraw nga “spark” iti tangatang.
Daytoy ti gapuanan a nauram ti “ceiling” iti ngatuen ti banda.
Dagos met a rimmisponde dagiti bumbero iti nakapasamakan ti uram.
Maibasar iti rekord ti North Macedonia’s MRT public broadcaster, duapulo ket pito (27) a tattao ti agpatpataming iti Skopje City Hospital gapu iti “severe burns,” ken duapulo ket tallo (23) ti agpatpataming iti Clinical Center.
Karaman kadagiti nadangran ket dagiti menor de edad.
Gapu iti napasamak, kiddaw ni Prime Minister Hristijan Mickoski kadagiti maseknan nga otoridad a tulungan dagiti nadangran ken suportaran dagiti pamilia dagiti biktima.
