BAGUIO CITY – Dumanonen iti agarup 5,140 a workers iti rehion Cordillera ti napukawan ti panggedan manipud naideklara ti enhanced community quarantine agingga ita a modified general community quarantine gapu iti COVID-19 pandemic.
Iti interview ti Bombo Radyo Baguio, kinuna ni Department of Labor and Employment (DOLE) – Cordillera Regional Director Exequiel Ronie Guzman a 5,107 kadagiti nasao a workers ket nagtaud iti 59 nga establishimiento iti rehion a naipasidong iti partial closure.
Innayonna a ti met 29 a workers ket nagtaud kadagiti lima nga establishimiento a nagdeklara iti total closure.
Dinakamatna a kaaduan kadagitoy a negosyo ket iti Baguio City ken Benguet a pakairamanan dagiti micro, medium and small enterprises a kaaduanna ket dagiti retail ken service establishments.
Inlawlawagna a gapu iti panagbassit dagiti kostumer ken kliyente ket napilitan a nangideklara iti retrenchment wenno panagkissay iti empleyado dagiti naapektaran nga establishimiento tapnu maliklikan ti ad-adda a panakalugi dagitoy.
Ipaspasigurado met ti opisinada a maipapaay dagiti employers ti sweldo ken amin a sepatation benifits dagiti empleyado nga inikkat dagitoy.
Innayonna nga agtultuloy pay a makaaw-awat ti opisinada iti notice of separation ken retrenchment manipud kadagiti negosyo a naapektaran iti agdama a pandemya.