BAGUIO CITY – Umaw-awat ita ti Philippine Overseas Employment Authority (POEA) Regional Extension Unit – Cordillera iti aplikasyon dagiti Filipino nurses nga interesado nga agtrabaho sadiay Federal Republic of GERMANY.
Sigun kenni Adela Dario, OIC ti POEA – Cordillera, adda ti bilateral agreement ti Pilipinas, babaen iti POEA ken ti pagilian a Germany iti sidong ti government to government hiring.
Kinunana a gapu iti daytoy ket ti POEA ita ti mang-hire iti agarup 400 a nurses a Pilipino nga addaan especialization iti Geriatric Care, ICU ken General Ward nga agtrabaho iti German Federal Employement Agency.
Innayonna nga inton June 2 ket adda ti orientation kadagiti Public Employment Service Office managers iti entero a Cordillera bayat nga inton June 26 ti tentative nga schedule ti interview dagiti aplikante kagiddan ti panagsanay dagitoy para iti German language.
Dinakamatna a maiprayoridad dagiti Cordillerans ken dagiti asideg a probinsya nupay ita paylaeng ket 33 ti naawatda nga application folders.
Nasken a dagiti agaplikar ket lisensiado a nurse ken addaan dua a tawen a propesyonal a kapadasan kas nars iti ospital, rehab centers ken care institutions bayat a mabalin nga isumitirda dagiti dokumentoda iti POEA-Cordillera sadiay Benitez Court Compound, Magsaysay Avenue, Baguio City sakbay ti JUNE 15.
Kabayatanna, agkasapulanda met iti 150 a nars ken 600 a care workers para iti Japan.
Para iti kanayunan nga impormasyon, bisitaen laeng ti website ti POEA-Cordillera.
