Kinumpirmar ni Philippine National Police Spokesperson Police Brigadier General Randulf Tuaño a naikaten iti puwesto dagiti agarup 70 a kapulisan nga miyembro iti Mobile Force Battalion 14B gapu iti maatap nga hazing idiay Lamitan, Basilan.
Napasamak ti nasao nga hazing idi Pebrero 6 kabayatan iti reception rites dagiti baro a kapulisan, no sadino naalaan pay ti video daytoy ken nag viral kadagiti nagduduma nga social media platforms.
Sigun kenni Philippine National Police General Tuaño, karaman kadagiti 70 a kapulisan a naikat iti pwesto ket 12 nga non-commissioned officer a direkta konektado iti nadakamat a panangmaltrato kadagiti baro a kapulisan.
Iti agdama, naipasidungen iti kustodiya ti Regional Personnel Records Management Division–Regional Police Holding ken Accounting Section ti Parang, Maguindanao del Norte dagiti kapulisan kabayatan iti imbestigasyon.
Dumanon met iti 18 dagiti bilang ti nagreklamo iti nasao a panang-abuso ken posible a manayunan pay daytoy iti 110 nga complainants.
Inyunayunay met ti Philippine National Police nga nainget a maiparparit ti hazing ken anyaman a kinaranggas iti amin nga training ken orientation rites. // Bombo Karen Calpoe Sapirao
