BAGUIO CITY – Manamnama a maipasidong iti RT-PCR testing ti agarup 7,000 nga indibidual sadiay probinsia ti Apayao gapu iti ngumatngato a bilang ti kasoda iti nasao a sakit sadiay.
Isayangkat ti National Task Force on Emerging Infectious Disease babaen iti Bases Conversion Development Authority ti lima nga aldaw nga Aggressive Community Testing sadiay Apayao a mangrugi inton August 24 ken agleppas inton August 28.
Maisayangkat ti aktibidad iti inisyatibo ti Cordillera Regional Task Force tapnu matulongan ti Apayao iti panakalapped ti napartak a panagwaras ti COVID-19 sadiay.
Naamuan a kiniddaw ti provincial government ti Apayao babaen kenni Governor Eleanor Bulut-Begtang ti nasao a mass testing kalpasan a ngimmato ti kasoda sadiay iti COVID-19 kadagiti napalpalabas a bulan ken iti panakaduktal ti presensia ti Delta variant sadiay.
Iti agdama, naklasipikar ti Apayao iti ‘high epidemic risk level’ gapu iti panakailista ti killaat a panag-adu ti kaso ti COVID-19 malaksid pay iti tallo a kaso ti Delta variant ken nasurok 20 a kaso ti dadduma a variants ti COVID-19.
Maibasar iti datus idi August 19, nasuroken iti 3.400 ti kaso ti COVID-19 sadiay Apayao a bukbuklen ti nasurok 2,700 a panagrekober, 687 nga aktibo a kaso ken 36 nga ipupusay.
Naibalakad met ti panangipasigurado ti provincial government ti Apayao iti kaadda ti kanayonan nga isolation facilities para iti manamnama a panagadu ti kasoda iti COVID-19 kalpasan ti maisayangkat a mass testing.
Makidkiddaw pay ti panakikaykaysa dagiti umili ti Apayao iti nasao a mass testing kontra iti COVID-19 kagiddan ti panagtulnogda latta iti amin a health and safety protocols.
