BAGUIO CITY– Dumanon iti 7,000 a miyembro ti Cordillera PNP ti nagsapata a mangidonar iti P500 manipud iti kaudian a sweldo dagitoy para iti panakatarimaan ti Sadanga foot bridge sadiay Mt. Province.
Imbutaktak daytoy ni Police Regional Office Cordillera Director PBGen. R’win Pagkalinawan kabayatan ti maikadua a Cordillera Regional Law Enforcement Coordinating Council meeting dagitoy babaen iti teleconference.
Kinunana a ti panakatarimaan ti footbridge ket maysa kadagiti priyoridad a proyekto ni Sadanga Mayor Gabino Gangangan.
Maipalagip a nadangran ti 11 nga indibidual iti pakapugsat ti nagnaanda a foot bridge sadiay Sitio Futyang, Betwagan, Sadanga, Mt. Province idi Nobyembre ti napalabas a tawen.
Immuna metten a kinuna ni PCapt. Nelson Judan, hepe ti Sadanga Municipal Police Station a naggigiddan a nagna wenno nagballasiw dagiti biktima iti daan a Fotyang Footbridge idi killaat a napugsat ti kable ti rangtay a rason iti panakatnag dagiti biktima iti karayan.
Naamuan pay a dagiti biktima ket sangapulo a lallaki ken maysa a babai ken dagitoy ket nagtaud iti lamay ti kalugaranda sadiay.
Mapapati nga overloading ti rason ti aksidente nangrunata daanen ti nasao a footbridge.
Photos from: PIA-CAR
