Dumanon iti agarup 90,000 a tattao ti nakipaset iti Trillion peso march a naipatungpal iti nagduduma a paset ti intero a pagilian idi Nobiembre 30, 2025.
Sigun iti Philippine National Police, naisayangkat ti kadakkelan a rally sadiay Metro Manila.
Impeksa met ni PNP acting chief Lieutenant General Jose Melencio Nartatez Jr. ti panangaprisiarna kadagiti organizers, marshals, ken dagiti nakipaset gapu iti impakita dagitoy a disiplina, ken respeto iti publiko.
Impettengna a ti kooperasion dagitoy ket nakatulong para iti natalna a pannakaipatungpal ti nasao a rally.
Iti baet dayta, kinuna ni Nartatez a sumagmamano nga indibidual ti mapapati a nangpadas a mangriribuk iti sumagmamano a rally.
Nupay kasta, dagus metlaeng daytoy a naipaayan iti aksion babaen kadagiti response team.
