Impakaammo ti Philippine National Police (PNP) a dumanon iti agarup 9, 027 a police officers ti naikkat iti serbisio sipud 2016.
Daytoy ket kalpasan a naduktalan a nakabasol dagitoy iti nadumaduma nga administrative offenses.
Manipud iti nasao a bilang, 1,037 dagiti naikkat iti serbisio gapu iti drug-related offenses wenno nagpositibo dagitoy iti panagaramat iti iligal a droga.
Maibasar met iti datos ti Directorate for Personnel and Records Management (DPRM), dumanon iti 32,698 a police personnel ti naduktalan a guilty iti administrative charges manipud July 2016 agingga November 26, 2025.
Malaksid kadagiti naikkat iti serbisio, dumanon iti 1, 755 a personnel iti nasao nga ahensia ti na-demote bayat a 15,311 ti nakaawat iti suspension orders ken dadduma pay.
Sigun kenni PNP acting chief Lieutenant General Jose Melencio Nartatez Jr., saan nga agdua-dua ti PNP a mangipakat iti disiplina ken mangikkat kadagiti kameng ti PNP a nangliput ken nangdadael iti panagtalek dagiti Pilipino.
