Agarup 99 nga indibidual nga aplikante ti na-hired on the spot (HOTS) iti naipatungpal a maika-128th Kalayaan Job Fair a naipatungpal idiay SkyZone, PortaVaga Mall, Baguio City itay kanikadua.
Sigun iti datos ti Department of Labor and Employment- Cordillera (DOLE-CAR), dumanon iti nasaurok sangaribo dagiti registered jobseekers a nagturong iti nasao nga aktibidad.
Saan pay karaman iti nasao a bilang dagiti regular jobseekers a dumanon iti 94.
Manipud iti 99 a na-hired on the spot, 33 kadagitoy dagiti lallaki bayat nga innem a pulo ket innem ti babbai.
Kabayatanna, 101 met ti nairekord a nearly hired, kayatna a sawen dagitoy dagiti posible nga adda pay laeng dagiti requirements a kasapulanda nga isimpa wenno iproseso.
Sigun kenni Imelda E. Romanillos, Regional Director ti DOLE-Cordillera, dumanon iti 929 a job vacancies ti naidiaya manipud iti 35 nga partner agencies wenno employers.
Duapullo ket dua kadagiti bilang ti partner agencies ket private companies bayat a ti tallo met ket government agencies.
Impeksa ni Romanillos a gapu iti agtultuloy a pannakaipatungpal ti nasao nga aktibidad iti Rehiyon Cordillera, nag-top ti nasao a rehiyon kas kangatuan iti employment ken maysa kadagiti rehiyon a kababaan iti unemployment maibasar iti kaudian a survey ti Philippine Statistics Authority (PSA).
Kabayatanna, naipatungpal metlaeng ti Job Fair idiay Ifugao kagiddan metlaeng ti panangobersbar iti Independence Day idi Hunyo 12 no sadino 17 met nga aplikante ti na-hired on the spot. // Bombo Noveh Organo
