Maysa a netizen ti nangipablaak iti social media ti maipapan iti naparut a mulana a papatas idiay Natunglob, Sinto, Bauko, Mt. Province.
Sigun iti maseknan a mannalon nga addaan ti legal nga edad, naammoana ti napasamak kadagiti mulana idi laeng kalman ti agsapa, Mayo 24.
Dinakamatna nga agarup dua gasut a puon ti patatas ti naparut.
Patienna a napasamak daytoy idi rabii ti Mayo 22, 2024.
Impeksana a lima pulo nga aldaw laeng sipud naimula ti patatas rason nga adda pailaeng daytoy iti vegetative stage wenno rugrugianna pailaeng nga aglames.
Sigun pay kenkuana, ti garden a nakaimulaan ti patatas ket asideg laeng iti kalsada.
Adda ti dua a kaaruba ti biktima ngem nagiinnadayo dagitoy ken agarup 200 meters ti kaadayona iti sentro ti barangay.
Saanna met a maibaga nu manu ti lugina iti natakaw a mulana.
Imbinglayna a daytoyen ti maikadua a gundaway a napasamak daytoy iti mulana.
Idi metlaeng Setyembre 22 idi napan a tawen, iti kapada metlaeng a garden, kinali metlaeng dagiti saan a nabigbig a suspek dagiti mulana a patatas.
Agarup 400 a kilos idi ti kinali dagiti suspek ken ti balor pay ti tunggal kilo idi ti patatas ket 40 pesos.
Naireport metten daytoy iti maseknan a barangay.
