BAGUIO CITY – Dumanon iti agarup kagudua a milyon a pisos ti gatad ti marijuana a nakumpiskar dagiti kameng ti Sadanga Municipal Police Station sadiay Sitio Ampawilen, Poblacion, Sadanga, Mt. Province idi kanikadua.
Maibasar iti report, pinara dagiti pulis ti kotse a nagluganan dagiti uppat a suspek iti impatungpalda a checkpoint iti national road iti nasao a lugar.
Nabigbig dagiti suspek a da Robin Ayco Jacob, 25-anyos, negosyante; Pedro San Antonio Gonzales, 48-anyos; Marvin Pastora Martir ken ni Lister Ayzlei Pangilinan Allada a bin-ig a residente ti Biñan, Laguna.
Naamuan a nagtaud dagitoy iti probinsia ti Kalinga ken agturongda sadiay Bontoc, Mountain Province idi nakemmeg dagitoy.
Nakumpiskar manipud kadagiti suspek ti 10 a rolled marijuana leaves ken 10 a bricks ti marijuana leaves nga agdagsen ti 17.4 kilos ken addaan ti Dangerous Drugs Board Value a P435,000.
