© Kalinga PPO
BAGUIO CITY – Nadiskobre ti P1.825-M a gatad dagiti marijuana bricks iti igid ti kalsada sadiay Dangoy, Lubuagan, Kalinga idi parbangon kalman.
Maibasar iti report, nakaawat iti tawag dagiti personnel ti Lubuagan Municipal Police Station seknan iti narekober nga uppat a bagahe a naglaon ti marijuana bricks iti bisinidad ti Pucoc, Barangay Dangoy babaen kadagiti personnel ti 2nd Kalinga Provincial Mobile Force Company.
Nasarakan dagiti kontrabando a nailemmeng iti karuruutan iti ngato ti kalsada kalpasan a nasilawan daytoy ti lugan dagiti pulis nga agpapatrolya.
Apaman a sinukimat dagiti pulis dagiti bagahe, naduktalan a naglaon dagitoy iti 71 a pidaso ti napagango a marijuana bricks ken dua a tubular marijuana a mapattapatta nga agdagsen ti 73 kilos.
Naipaima metten dagiti kontrabando iti Lubuagan Municipal Police Station para iti umno a disposisyon.
