BAGUIO CITY – An-anupen ita dagiti otoridad ti lalaki a timpuak iti rangkis kalpasan a naaksidente kabayatan ti pangibiahena iti minilyon a pisos a gatad ti marijuana bricks paruar iti Tabuk City, Kalinga idi rabii.
Maibasar iti report, paturong dagiti pulis sadiay Dinakan, Lubuagan tapnu mangibangon ti checkpoint kalpasan a nakaawatda iti report seknan iti maibibiahe a marijuana.
Nupay kasta, idi addadan iti deppaar ti Barangay Lucog ket nasabatda ti maysa a nakamotorsiklo ken nakitada ti panakatumba daytoy iti kalsada ken ti panakatnag ti box a nakatali iti likod ti motorsiklo.
Dagus a simmardeng dagiti pulis tapnu tulongan ti driver ti motorsiklo ngem killaat daytoy a timmaray iti igid ti kalsada ken limmagto iti rangkis a paturong iti Chico River, no sadino, nabati ti motorsiklo, ti box ken ti bassit nga sling bag.
Nadiskobre ken nakumpiskar ti 33 a kilo ti maatap a marijuana bricks nga aggatad ti agarup P4.3-M a linaon ti box.
Napaay met dagiti pulis a makasarak iti naglibas a driver ti motorsiklo ngem nadiskobre iti nabati nga sling bag ti sumagmamano nga IDs ken ti OR-CR ti motorsiklo, no sadino, nakanagan amin dagitoy kenni Kennedy Bocad Adaoal.
Impanamnama met dagiti otoridad nga aramidenda ti amin tapnu matiliw ti nakalibas nga indibidual ken irtenganda pay ti panangsukimatda kadagiti border control points tapnu malapdan ti aniaman a gandat a panangibiahe iti iligal a droga, paruar ken pastrek iti Cordillera Region.
