BAGUIO CITY- Natakaw ti agarup P443,000 a gatad dagiti nginginaen nga alahas iti maysa a pagtengan sadiay Lower Liwanag, Loakan, Baguio city.
Karaman kadagiti natakaw ti maysa a pares ti “white dangling diamond earing” nga agatad iti agarup P38,000; yellow gold ring nga addaan iti blue sapphire ken diamond nga agatad iti agarup P24,000.00; maysa nga 18 karat gold chanel bracelet nga agatad iti agarup P60,000; tallo a necklace with diamond pendants nga agatad iti agarup P91,000; maysa a paris ti 18 karat gold diamond earing nga agatad iti agarup P22,000; ken maysa a pendant with jordam design nga agatad met iti agarup P8,000.
Maibasar iti report ti kapulisan, inreklamo ti 72-anyos a housewife kadagiti otoridad a mapukpukaw dagiti nasao nga alahas daytoy.
Iti inisial nga imbestigasyon dagiti otoridad, ti suspek ket 41-anyos a lalaki, family house helper ti biktima sipud 2009 agingga iti bulan ti Hunio 2026.
Addaan daytoy iti provincial address a Zamboanga, Sibugay.
Rumrumwar iti inisial nga imbestigasyon ti otoridad a nagtravel ti biktima sadiay Manila ken nagyan iti presidential security group (PSG) quarters sadiay Malacañang a pagnanaedan ti anakna.
Nabati ti suspek nga agmaymaysa iti pagtaenganna sadiay Lower Liwanag.
Nagsubli ti biktima iti siudad ti Baguio idi Hulio 2026 ngem saanna a dagus a sinukimat dagiti alahasna agsipudta, patienna a saan a nagaraw iti bag a naidulin iti Cabinet iti kuartona.
Nupay kasta, naduktalanna a mapukpukaw dagiti alas idi Hulio 26, 2026 bayat nga agsagsagana a dumar-ay iti kasar.
Dita metten a napanunut ti biktima a sakbay a nagturong sadiay Manila, imbatina ti duplicate ti tulbek ti kuartona a nakabitin iti kitchen sink.
Atapen ti biktima a ginundawayan ti suspek nga inala ken inaramat a nanglukat iti kuarto daytoy.
Posible a kalpasan nga inaala ti suspek dagiti nadakamat nga alahas, pimmanaw ken saanen makontak gaputa naiblock dagiti biktima iti cellphone number ken social media accounts.
Iti laksid ti panagregget ti biktima a sapulen ti suspek ken kontaken, saanda ladta a masapulan daytoy.
Gapu iti dayta, inkeddeng dagitoyen nga ireport ti insidente iti kapulisan idi July 27, 2026.
Posible a sumango ti suspek iti kaso a panglabsing iti Article 310 iti Revised Penal Code (RPC), qualified theft (Article 310.//Bombo Noveh Organo