CORDILLERA, REGION – Dumanon iti agarup 49.8 million nga standard drug price ti ilegal a droga ti kinompiskar ken dinadadael dagiti kameng ti PNP Drug enforcement group iti rehion Cordillera.
Iti interview ti Bombo Radyo kenni Pat. Ysrael Rard-Jay Butale ti Demand Reduction and supply Section – Philippine National Police (PNP) Drug Enforcement Group – Special Operations Unit-Cordillera, kinunana a balligi nga impatungpalda ti walo a buy-bust operation ken pito a marijuana eradication manipud Enero agingga iti Marso ti agdama a tawen.
Iti nasao nga operasyon, dumanon iti 12 nga illegal drug personalities ti naarestar no sadino, buklen ti 11 a lallaki ken maysa a babae.
Sigun kenni Pat Butale, kagedwa kadagiti naarestar a drug personalities ket nagtaud iti nagduduma a rehion malaksid iti rehion Cordillera.
Kabayatanna, dumanon iti agarup 90.4 a gramo ti nakompiskar a shabu; 206, 750 a puon ti marijuana ti pinarot dagiti otoridad bayat a dumanon iti 54. 75 a kilos ti tubular marijuana wenno bricks ti nakompiskar.
Naipatungpal ti tallo nga operasyon iti siudad, innem iti probinsiya ti Benguet, maysa iti Abra ken lima iti probinsiya ti Kalinga.//mp4
