BAGUIO CITY – Agtultuloy ti supply reduction operations ken demand reduction efforts ti Philippine Drug Enforcement Agency (PDEA) – Cordillera tapnu naan-anayen a maparmek ti iligal a droga ditoy rehion Cordillera.
Sigun kenni PDEA-Cordillera public information officer Rosel Sarmiento, nagresulta dagitoy a kampanya iti panakakumpiskar ken panakadadael ti agarup P520-M a gatad ti marijuana manipud Enero agingga Oktobre ita a tawen.
Dinakamatna a nakaisayangkat dagiti operatiba ti ahensia iti 75 a panagparut kadagiti pinuon ti marijuana, 13 a buy-bust operations ken 12 nga interdiction wenno checkpoint operations.
Kagiddan iti daytoy ket imbalakadna ti panagsardengen dagiti indibidual nga addaan transaksion iti iligal a droga gaputa saan dagitoy a sardengen dagiti operatiba.
