BAGUIO CITY – Im-imbestigaran ita dagiti pulis ti kaso a panag-hold-up sadiay Alibangbang, Liwan West, Rizal, Kalinga idi Sabado.
Nabigbig ti biktima a ni Christopher Anog, 34-anyos, baro, operations manager ti Onon Marketing ken residente ti Pallua Road, Pallua Norte, Tuguegarao City, Cagayan.
Naamuan a dagiti suspek ket innem a saan pay a nabigbig a lallaki a nakaimet iti atiddog a paltog ken nakasuot dagitoy iti bonete.
Maibasar iti imbestigasyon, agbibiahe ti biktima ken ti anakna iti Kalinga-Cagayan National Road babaen iti minivan daytoy paturong sadiay Tuguegarao City manipud sadiay Tabuk City, Kalinga ken imetda ti collection money ti opisinada sadiay Magsaysay, Tabuk City, Kalinga.
Nupay kasta, idi nakadanunda iti nakapasamakan ti insidente ket innem a lallaki a nakaimet iti atiddog a paltog ken nakabonete ti nangpara kenkuana ken nangideklara ti ‘hold-up’.
Natakaw dagiti suspek ti maysa a laptop, prepaid wifi, wallet, driver’s license, Philhealth ID, unit ID, ATM card, nagduduma a resibo ken cash a dumanon iti agarup P745,000 ken pito a pidaso ti cheke nga aggatad ti nasurok P229,000.
Nagturong dagiti suspek paturong iti laud a direksion bayat a nagkamang ti biktima iti pagtaengan ti maysa a residente sadiay Rizal, Kalinga para iti panagpatulong iti pulisya.
Nangisayangkat dagiti pulis ti hot pursuit operation kontra kadagiti suspek bayat nga agtultuloy ti imbestigasyon.
