Dumanon iti 815 nga otot (rat) ti natiliw iti Baguio City Public Market para iti maikadua a gundaway a panakaipatungpal ti rat catching challenge ita a tawen.
Daytoy ket nababbaba nu idilig iti 1,766 nga otot a natiliw iti umuna a rat catching challenge idi tawen 2020 nu sadino mangipasimudaag daytoy a nabawasan dagiti otot nga adda iti nasao a merkado publiko.
Kabayatanna, naipaayen dagiti papremyo para kadagiti winners iti nasao a rat catching challenge a nangrugi idi Mayo agingga Agosto iti agdama a tawen.
Ti overall winner iti nasao a challenge ket ti Entrails Section a nakaawat iti P25,000 cash prize; maikadua ti Chicken Balila Section a nakaawat iti P15,000 cash prize ken ti maikatlo ket ti Pines Meat Mart Section a naakawat iti P10,000 cash prize.
Iti sabali a bangir, inyebkas ni Baguio City Mayor Benjamin Magalong ti panagyamanna kadagiti amin a vendors ken kadagiti amin a nakipaset iti nasao a challenge tapno mapagtalinaed ti kinadalus iti merkado.
