BAGUIO CITY – Agpada a nagpositibo iti COVID-19 ti agasawa a mayor ken bise mayor ti Bangued, Abra.
Iti social media account ni Abra Governor Joy Bernos, inwaragawagna a nagpositibo iti COVID-19 dagiti nagannakna a da Bangued Mayor Dominic Valera ken Vice Mayor Mila Valera.
Naamuan a rimwar idi kalman, September 2 ti positibo a resulta ti RT-PCR test ti agasawa a Valera iti baet nga agpada a nabakunaanen dagitoy kontra iti COVID-19.
Nupay kasta, kinuna ni Gov. Bernos a mild symptoms ti marikrikna dagiti nagannakna, partikular ti panateng.
Gapu iti daytoy, kidkiddawenda kadagiti nakapulpulapol dagiti nagannakna iti dagus dagitoy a panangipaka-ammo iti Rural Health Unit a close contact dagitoy.
Kinunana a babaen iti daytoy ket mapapartak ti contact tracing.
Inyapelana pay ti panag-quarantine dagiti close contacts ti agasawa a Valera para metlaeng iti kinatalgedda ken ti pamilya dagitoy.
Kagiddan iti daytoy, impetteng manen ti gobyernadora ti pagkasapulan ti kanayon a panagannad ken ti panagtulnog kadagiti naipaulog a paglintegan kontra iti COVID-19.
