BAGUIO CITY – Sumangsango iti uppat a bila ti kaso nga estafa ti maysa nga agasawa ditoy Baguio City kalpasan nga inallilawda ti uppat a negosyante ken intarayda ti P11.24-M a kwarta dagitoy.
Nabigbig ti agasawa a da Rommel ken Jonalyn Esteban, agpada nga adda iti legal nga edad ken residente dagitoy ti Paraan Street, Victoria Village, Quezon Hill, Baguio City.
Sigun kadagiti biktima, nagpabigbig ti agasawa nga agtagikua ti fishponds sadiay Binmaley, Pangasinan ken agbirbirukda iti agbalin a kasosyoda iti nasao a negosyoda.
Nagpabigbig pay ti agasawa kas sales agents ti maysa a grocery store ditoy Baguio ken La Trinidad, Benguet no sadino, kinunada nga otorisadoda nga agideliver ken agilako wenno agipa-utang iti wholesale kadagiti produkto ti nasao a grocery store.
Kinuna dagiti biktima nga agideldeliver pay dagiti suspeki iti nagduduma nga ikan ken karne ti baboy.
Naguyugoy met dagiti biktima nga agpuonan kadagiti agasawa gapu iti nagduduma a diaya dagitoy ken iti kari dagiti suspek a dagus a dumakkel ti puonan dagiti biktima.
Nabaelan pay ti agasawa a nagideliver ti nagduduma a produkto kadagiti biktima agingga a killaat laengen dagitoy a saan a nagparparang kadagiti biktima. (-report by Bombo Charles Nikko Limon)
