BAGUIO CITY – Rinebbek ti nagtipon a pwersa ti PDEA ken PNP ti balay ti maysa nga agasawa a High Value Targets sadiay Lingtan, Bangued, Abra.
Nabigbig dagitoy a da Dennis Millare Montorio, 40-anyos ken Janice Millare Montorio, 34-anyos, agpada a banana cue vendors.
Naisayangkat ti drug raid babaen iti bileg ti search warrant nga impaulog ni Judge Rouella Melinda Atmosfera ti MTC, Lagangilang, Abra.
Nakumpiskar iti pagtaengan ti agasawa ti nagduduma a drug paraphernalia ken dua a pakete ti mapapati a shabu.
Nainget met a pinaglibakan ti agasawa a kukuada dagiti nasarakan a shabu.
Sigun iti PDEA-Abra, karaman ti agasawa iti target list ti ahensia kalpasan a nawanawanan ti panagsublida iti iligal nga aktibidad.
Naamuan a simmuko ti agasawa iti Oplan Tokhang ken immunan a natiliwda idi 2015 babaen iti drug raid ngem nakapiansa dagitoy.
Sumangsango manen ti agasawa iti kaso a panaglabsing iti RA 9165 wenno ti Comprehensive Dangerous Drugs Act of 2002.
