BAGUIO CITY – Kinemmeg ti nagtipon nga operatiba ti Baguio City Police Office (BCPO) – Station 7 ken Baliuag, Bulacan PNP ti maysa nga agasawa gapu iti kasoda nga illegal recruitment ken estafa idi kanikadua.
Nabigbig dagitoy a da Randy Cabug Magsilang, 43-anyos, tubo ti Bongabon, Nueva Ecija ken ti asawana a ni Rizza Cruz Magsilang, 38-anyos, tubo ti Plaridel, Bulacan ken dagitoy ket residente ti Sabang, Baliwag, Bulacan.
Nakemmeg dagitoy babaen iti bileg ti dua a warrants of arrest kontra kadakuada.
Impaulog ni Judge Maria Clarita Casuga-Tabin manipud iti Municipal Trial Court in Cities-Branch 4, Baguio City ti umuna a warrant of arrest kontra iti agasawa gapu iti kaso nga estafa nga addaan iti piyansa a sag-P200,000.
Impaulog met ni Presiding Judge Cecilia Corazon Dulay-Archog ti Regional Trial Court-Branch 6, Baguio City ti maikadua a warrant of arrest kontra iti agasawa gapu iti kaso nga illegal recruitment nga addaan piyansa a sag-P300,000.
Napaay a nagpiyansa ti agasawa a nangitunda iti panakaibaludda iti Baguio City Jail.
