BAGUIO CITY – Sukimaten ti Department of Public Works and Highways (DPWH) – Cordillera dagiti agdama a disenyo dagiti kalkalsada ditoy rehion.
Sigun kenni DPWH-Cordillera Regional Director Engr. Tiburcio Canlas, babaen iti daytoy ket maipanamnama ti napintas nga implementasyon dagiti nakalinya a proyekto ti ahensia para kadagiti kalsada iti rehion.
Kinunana a makikokoordinar ita dagiti technical personnel ti ahensia kadagiti opisiales ti Bureau of Design tapnu mabukel dagiti umno a disenyo dagiti kalsada tapnu maliklikan ti panakapasamak ti landslides ken road cuts kabayatan ti bagyo.
Dinakamatna a kasapulan nga adalenda ti sumagmamano a panakabaliw ti agdama a desinyo dagiti kalkalsada iti rehion tapnu mapagbalin dagitoy nga “all-weather roads”.
Inaklonna pay a marigatan dagiti personnel ti ahensia nangruna dagiti nagduduma a district engineering offices nga agdalos kadagiti landslides ken mangtarimaan kadagiti mapaspasamak a road cuts tapnu laeng saan a nakaro a maapektaran dagiti motorista ken mannalon nga agibiyahe iti apit dagitoy a nateng.
