Naituding nga agipila ti forfeiture case iti korte ti Land Registration Authority (LRA) ken Office of the Solicitor General (OSG) kontra iti tallo gasut duapulo a daga a saan a titulado nga aggatad ti binilbilyun ken kukua iti maatap a Chinese drug lord a ni Willie Ong ken ti kakaduana manipod iti nagduduma a lugar iti pagilian.
Sigun kenni Surigao del Sur 2nd District Rep. Robert Ace Barbers, inwaragwag ti Land Registration Authority (LRA) ken Office of the Solicitor General (OSG) ti panagkumitda iti pannakadengngeg ti House Committee on Dangerous Drugs.
Kinuna pay ni Barbers a ni Ong ket dagiti “kasosyo” daytoy ket posible a lehitimo a Chinese nationals nga agpampammarang a maysa a Pilipino.
Maatap a nakalibasen ni Ong nga addaan ti Chinese a nagan a Cai Qime idi Oktubre 2023 usar ti bukodna a Chinese passport.
Saan pay a nalawag kadagiti otoridad nu sadinno dagiti kakadua wenno “kasosyo” ni Ong a da Aedi Tai Yang, Jack Tai Yang, Michelle Santos Sy, Elaine Chua ken dadduma pay.
Dagitoy ket agtagikua iti 55% iti Empire 999 a maysa a panaglabsing iti linteg iti limitasion a 60-40 equity para kadagiti ganganaet.
