BAGUIO CITY – Sumangsango iti kaso a panaglabsing iti Article 276 Revised Penal Code wenno ti Abandoning a minor dagiti nagannak a nangibati iti maladaga iti maysa a transient house idiay Barangay Lower Rock Quarry, Baguio City idi napan a tawen.
Iti interview ni Bombo Jez Lapizar kenni PMaj. Harriet Bulcio, Information Officer ti Baguio City Police Office, kinunana a nakaala dagitoy ti ebidensiya a nangitunda iti pannakabigbig dagiti nagannak ti maladaga.
Maipalagip nga idi napan a tawen ket nakaawat ti pulisya ti report seknan iti naabandona a maladaga a dagus met a nirespondeanda.
Kinuna ni PMaj. Bulcio a dakkel ti tulong dagiti residente ken opisyales ti Barangay Lower Rock Quarry iti panakabiruk ti nanang ti maladaga.
Naduktalan a dagiti nangibati iti nasao a maladaga ket aggayyem manipud Metro Manila nu sadino nagpasyarda laeng iti siyudad ti Baguio.
Kabayatanna, imbinglay ni PMaj. Bulcio a saan a maipasidong iti adoption ti maladaga gapu iti sakit a naalana idi naabandona daytoy.
Immapela met ti nasao nga opisyal iti publiko a saanda a tuladen ti kapada nga insidente gapu ta nadagsen ti pannusa a maipataw iti daytoy.
